|
|
|
|
GANACSATADA AWDAL OO
TAAGEERAY HESHIISKII XUKUUMADU LA GASHAY GANACSADE AL JABIRI. |
|
|
Boorama[DSN]Ganacsatada G/awdal ayaa taageertay heshiishkii
dhoofka xoolaha ee ay xukuumada somaliland la gashay
ganacsadaha Sucuudiyaanka ah ee Al Jabiri oo sida ay xukuumadu
sheegtay ogolaaday inuu kordhiyo qiimaha sixirka uu ku
qaadanayo neefka xoolaha arintaas oo ka mid ahayd
cabashooyinkii ay ganacsatada xooluhu u dalbanayeen in kootada
laga qaado dhoofka xoolaha.
Ganacsatadan xoolaha ee reer Awdal oo shalay shirjaraaid ku
qabtay Hutelka Rays ee magaalada Booorama waxa kale oo ay ku
cambaareeyeen kooxo ay sheegeen inay sheegteen gudida
ganacsatada somaliland oo aanay cidna u dooran balse iskood
isku magacaabay kuwaas oo ay sheegeen inay mudooyinkii u
dambeeyay ku hawlanaayeen olole ka dhan ah heshiiska xukuumada
ee ganacsade Al Jaabiri arimahaas oo aanay ganacsatada xoolaha
ee Awdal ka warqabin una arkaan jahawareerin iyo cambaarayn
aan sal lahayn.
C/laahi Abiib Ciise oo ka mid ah ganacsatada Awdal ayaa ugu
horaynn shirkaa jaraaid ka akhriyay bayaan qoraal ah oo u
dhignaa sidan "Markaan aragnay halbowlaha xoolaha nooli u
leeyihiin dhaqaa;aha somaliland, xoolahaasi oo mudo ku dhow 7
sanadood ay saarnayd xayiraad xaga dhoofka xoolaha ah, gaar
ahaan wadamada khaliijka oo ah kuwii ugu badnaa ee xooleheena
qaadan jiray arintaas oo saamayn weyn dalkeena ku yeelatay.
Waxa nasiib wanaag ah in maalqabeenka weyn ee Al Jaabiri oo u
dhashay dalka sucuudiga uu suurto galiyay in xooleheena si
toos ah loogu qaato dalkeena iyada oo laga bixinayo qiime
macquul ah oo iimkana uu Al Jabiri ku kordhiyay qiimihii hore
ee 36 $ 6 uuna ka dhigay 42 $, waxa kale oo uu qiimaha ka
sokow balanqaaday in maxjarkii lagu baadhayay caafimaadka
xooleheena uu muddo shan bilood gudohood ku dhisi doono, taas
oo suuro galin doonta in xooleheena si toos ah uga dhoofaan
dakadeena Ber Bera ilaa wadamada khaliijka iyaga oo aan sii
marayn meel kale, waxa kale oo uu maalqabeenkani balanqaaday
inuu wax ka qaban doono sixir bararka dalkeena saameeyay, gaar
ahaana uu keeni doono shan markab oo raashin jaban ah kuwaas
oo wax weyn ka tari doona sixir bararka dalka aafeeyay.
Intaa haddii laga yimaado waxa uu maalqabeenkani maalgashi ku
samaysanayaa dalkeena JSL, waxaana lagu qiyaasi karaa hantida
maalgashiga ah ee ganacsatadan Al Jabiri u huray dalkkeena
malaayiin dollar arintaas oo ah mid aan hore inoo soo marin
loogana baran maalqabeen ajanabi ah waxaanay horseedi doontaa
in maalga;iyayaasha caalamiga ahi ku soo dhiiradaan inay
dalkeena maalgashadaan.
Hadaba anaga oo eegayna arimahaa aanu kor ku soo xusnay
waxaanu cadaynaynaa haddii aanu nahay ganacsatada xoolaha ee
Awdal inaanu si buuxda u taageersanahay heshiiska ay wada
galeen xukuumada iyo maalqabeenka Al Jabiri, ka dib markaan u
aragnay mid dan u ah xoolo dhaqatada, ganacsatada xoolaha iyo
mujtamaca dalka ku dhaqan oo dhan.
Waxa kale oo aanu halkan ka cambaaraynaynaa kuwa ku hadlaya
magaca ganacsatada xoolaha somaliland, nimankaas oo aan la
garanayn meel lagu soo doortay iyo cid u dooratay inay ku
hadlaan magaca ganacsatada, qaarkoodna la ogyahay inaanay wax
shaqo ah ku lahayn ganacsiga xoolahaba.
Ugu dambayn waxaan u soo jeedinaynaa nimankaa isku magacaabay
gudida ganacsatada somaliland inay ka waantoobaan iskana
ilaaliyaan dhibaatada iyo jahawareerka ay shacabka ku ridayaan,
waxaa kale oo aan u sheegaynaa inaanay ku hadli karin magaca
ganacsatada xoolaha, haddii ay doonayaan inay ganacsatada
hogaan u noqdaana ay u soo maraan dariiqa sharciga ah iyaga oo
soo maraya nidaamka ganacsiga xoolaha".
Hadalkaa qoraalka ah ka dib waxa halkaa erayo ka jeediyay
gudoomiyaha gudida ganacsatada xoolaha ee G/awdal oo
hadalkiisa ku yidhi" waayadii hore xukuumada waxaynu ku
dhaliili jirnay maxay uga hawlgali wayday xayiraada iyo suuq
gaynta xoolaha, maanta haddii ay sameeyeen oo ay dooneen wixii
inaga maqnaa oo ay maxjarkii caafimaadka xoolaha samaynayso,
wax sabab ah oo maanta lagu canaanan karaa karaa ma jiro sidaa
awgeed waxaanu si buuxda u taageersanahay heshiiska xukuumada
iyo ganacsade Al Jabiri, qolooyinkii dhawaan sheeganayay inay
ku hadlayaan magaca ganacsatada waanu cambaaraynaynaa mana
ogin meel lagu doortay iyo cid u dooratay, haddii ay
ganacsatada somaliland gudi samaysanayso waxa uu noqon doonaa
wax loo dhan yahay oo cidkasta iyo gobol kastaa ka muuqdo"
Aadan Maxamuud Hoori[ curaagte] oo isna ka mid ah ganacsatada
shirka jaraaid qabatay ayaa isna dhaleecayn u soo jeediyay
xubnahan sheegay inay ku hadlayeen magaca gudida ganacsatada
xoolaha ee somaliland isaga oo sheegay inaanay la qabin
waxyaabihii ay xubanahaasi ka hadleen ganactada xoolaha ee
Awdalna ay taageersan yihiin heshiiska xukuumada iyo ganacsade
Al Jabiri waxaana hadalkiisa ka mid ahaa"haddii ay kooxdaasi
qabaan dee anagu lama qabno mana aha waxa ay ku hadleen wax
loo dhan yahay, sidaa darteed haddii aanu nahay ganacsatada
xoolaha ee Awdal waxaanu taageersanahay xeshiiska cusub ee
xukuumada iyo ganacsade Aljabiri, sida raashinka jaban ee uu
inoo keenayo iyo maxjarka uu shanta bilood inoogu dhisayo oo
aynu kaga bixi doono xooleheena oo hada si ku meelgaadh ah loo
sii mariyo dalka Jabuuti, anaga oo waliba aaminsan Inuu
ganacsade Aljabiri inoo horseeday inuu furo xayiraadii
xooleheena saarnayd 7 da sano, intii aanu inoo imana waxa uu
ahaa neeka xoolahu waxaan 20$ ka badnayn isagaana suuro
galiyay in suuqii xooleheenu kor u kacaan, haddii uu markii
hore saluug ku jiray qiimaha uu xooleheena ku qaato maanta wuu
kordhiyay, waxaanan qabnaa in kooxahan kale markii ay arkeen
in Al Jabiri dhaqaajiyay xarakaadka suuqii xooleheena inay
iyaguna soo hungureeyeen iyaga oo adeegsanaya kooxahan is
magacaabay ee sheeganaya gudida ganacsatada xoolaha ".
Waxa kale oo iyaguna halkaa ka hadlay isla markaana taageeray
heshiiskan Al Jabiri iyo xukuumada xubno kale oo ka mid ah
ganacsatada Awdal ee xoolaha kuwaas oo ay ka mid ahaayeen
Khaliif Qaalib iyo Aw Xaashi Cige Warsame.
Cabdiraxmaan Mahamed Habane
Bnn ... Boramanews... Borama
|
|
|
|
|
| |
|
|
|
